都係要靠民間，土地先可以重生！全城近日因為搵地問題，嘈到拆天，特首林鄭月娥提出嘅東大嶼填海計劃更惹嚟萬人上街，反對政府倒錢落海，但查實唔少都知，其實仲有唔少地可以用，差在政府敢唔敢！

其實有民間團體去年逼迫下，政府終於放出超過800塊地俾非牟利機構申請短租，本來係好好嘅建議，點知事隔一年，據聞結果係800幾塊地，至今一塊地都無批出？有指因為申請手續太繁複，亦因政府動作太龜速。

民間社會就幫經常只懂北望神州嘅政府諗辦法。測量師Margaret Brooke最近同建築師羅健中成立咗一個叫名為「非常協作」的新平台，打算為一啲有心無力嘅民間團體，提供諮詢服務，協助佢哋申請閒置嘅政府土地。「非常協作」呢個新組織聚集咗一班建築師、工程師、測量師、規劃師、環境顧問、律師和會計師，早前已經喺城皇街夥拍一個社區團體「卅間之友」，打算用嗰度一塊地做「社區客廳」，將荒廢草地變成舒服空間，益街坊搞活動。你睇，呢啲先叫落手做嘢。

（摘自2018年10月18日，蘋果日報）